北海道遊記 (三)

6月26日 (旭山動物園, 美瑛, 中富良野)

今朝又係要一早起身. 因為我地要check-out跟住去旭山動物園. 其實仲有一個原因: 我仲未係好識用個GPS. 到嗰一刻,我仲未搵到方法set到嗰晚我地會住嘅Pension.

所以我只有早啲食完早餐,落去停車場攪個GPS. 世事就係咁奇怪,好多嘢都係到deadline就自然會攪掂,今次亦係一樣,我坐落冇幾耐就發現原本個GPS係support mapcode嘅. 只不過個menu item 喺尾二,仲要偽用日文片假名,所以早一日搵唔到. 既然揾到mapcode個function,我當然立即入哂嗰所有目的地入去啦.

旭山動物園 -- 美瑛車站 -- 中富良野車站 -- ログコテージひまわり (Log Cottage Himawari)

搞掂之後就僧合團友去checkout. 接住就係呢次旅行第一程長途車. 係呢個website http://northern-road.jp/navi/time/?dep=018328&arr=018307 可以check到喺北海道兩個地點之間行車所需要用嘅時間. 根據呢個website嘅資料, 由札幌去旭山動物園大約要1個鐘頭45分鐘. 我地大約十點出發,去到都成12:00. 行行下,睇下個GPS,預定到達時間係.....1:30pm!!! 點解咁遲嘅?

諗諗下頭先好似見到個GPS計路程嗰時好似show咗咩"無料優先". 會唔會幫我地揀咗行普通國道呢?

唔係啦,再set過先,今次揀"有料優先". 條path果然唔同咗, 行再無幾耐就上咗Expressway. 就係咁,1個鐘多啲就去到啦.

泊好架車之後去買入場券啦,果然係有名嘅景點,係售票處就見到香港人同一大班國語人啦.

動物園入面有好多不同嘅動物(廢話!),

我地嘅目標係:企鵝,海豹,同北極熊.

第一個目的地就係企鵝館啦.

之後就係隔離嘅海豹館,不過唔係好影到啲海豹

睇完海豹都有啲餓,咁啱個canteen就係海豹館出口, 我地就醫咗肚先.

之後就去埋北極熊館.

仲有猛獸館.

睇完猛獸我地就離開旭山動物園,向美瑛出發!

唔使一個鐘,我地就到咗美瑛車站啦. 美瑛車站同埋周圍都好優美,有啲歐陸小鎮feel.

其實去美瑛主要係為咗超廣角道路(パノラマロード フラワーランド )與拼布之路(パッチワークの路).但係GPS係唔會教我點行呢兩條路,所以我地就先去係美瑛車站嘅觀光案內所問下人啦. 係案內所門口見到3位香港男女係度租緊單車. 入到案內所我就即刻去搵資料而其餘3位團友就各有各忘,有人睇記念品,有人上網...搵咗一輪,除咗啲map之後都冇乜啱使嘅嘢,我唯有去counter問下嗰度啲姐姐/阿姐. 我用英文道出來意,佢地亦用英文好細心咁教我點行,仲係地圖度畫好哂條路點行,真係好多謝佢地. 問清楚之後,我就幫同事扲多咗幾份中文版嘅map,因為佢7月初都會黎玩. 然後大伙兒就急急走人,因為已經成下晝3點幾啦, 個天仲幾黑下. 去到停車場,發現泊係我地旁邊個車入面又係香港人. 香港人真係無處不在.

由於時間有限,我地選擇先行超廣角道路,有時間再行拼布之路,因為團友都唔係咁有興趣睇樹.

沿途風光如畫,可惜天氣唔好,好多黑雲,又有啲啲雨,所以我地去到三愛之丘展望公園先停落黎影相,

之後想去拓真館同四季彩之丘,但係我地又怕會落大雨,所以決定去四季彩之丘先.

四季彩之丘係一個好大嘅農場,種滿不同種類嘅花. 雖然我地早咗去(6月底),不過都有大約1/3嘅花開咗.我地就不停咁影相. 期間有幾陣雨,不過我地唔理咁多,係咁影,可能我地都驚跟住個日都會唔好天啦.

留咗個幾鐘先走. 團友們都唔想再去行其他地方,咁我就車咗佢地去美馬牛小學對面個停車場,由佢地係車入面聽下歌,休息下.

我就去影下美馬牛小學.

跟住我去埋美馬牛車站,原本諗住影幾張相就走,點知團友們覺得個度好靚,所以我地就一齊入去參觀. 其實嗰陣時個車站已經closed. 我地就趁冇人為所欲為.

玩完一輪,成6點幾,有啲肚餓,係時候去搵嘢食啦.

因為我地"形"住我地將會住個間ログコテージひまわり (Log Cottage Himawari)係冇晚餐食嘅,所以我地就諗住先去中富良野車站附近食晚餐,順便幫同事扲啲資料,再去便利店入貨,先去ログコテージひまわり check-in. 點知去到中富良野車站,個站已經關門,冇計,唯有第二日再黎扲嘢,去搵嘢食先. 中富良野車站附近嘅食店差不多都閂咗,最後我地搵到呢間未閂門,唯有入去啦.

雖然呢間舖頭細細,但係啲咖哩好好味,真係好彩.

食完晚餐,去埋便利店入貨,就去ログコテージひまわり check-in啦. 條山路都幾鬼祟下,好彩冇miss到,唔係就有排搵. 一去到,泊低架車諗任去check-in啦,吚?隔離架車咁似樣嘅? 原來係一樣model,不過唔同色. 個司機仲係香港人黎? 原來係一家五口黎自駕游,真係有人嘅地方就有香港人. 唔好理人咁多,check-in先. 今晚仲有花火大會,其實係先前係便利店買咗包煙花啫.