但係而家就唔同, 新書係外面嘅舖頭都同步買到, 而且宜家動漫節都冇折扣, 反而外面嘅舖頭會有平,又唔使排隊,所以今年可能唔入場啦.
不過點都好, 新書一樣會買, 今年嘅target係:
天下
浪客行#26(平裝) 【27/07 入手】
CROSS GAME#8 【31/07 入手】
JOJO奇妙的冒險PART 7~Steel Ball Run#12 【31/07 入手】
ONE PIECE#46 【31/07 入手】
玉皇朝
蒼天之拳#17
文化傳信
漂流艦隊#27
常務島耕作#6(完) 【25/07 入手】
7月3日 (秋葉原, 上野, 香港)
呢日係成個trip嘅最後一日,我地食完早餐,10:00 check-out酒店,將行李寄存係酒店之後就兵分兩路: Joanne同團友M 就留係上野shopping, 我就帶團友V去秋葉原行下.
始終秋葉原係啱男人多啲.
係秋葉原,我地終於玩到一路都好想玩嘅街機: Gundam -- 戰場之絆. 
點解咁想玩? 因為香港一定冇得玩. 由於部機好大部,而且一裝就起碼要裝4部,仲有一部terminal,香港唔會有地方同有人肯投資咁多,所以香港唔使旨意有得玩.
呢部機係玩嘅時候係要坐入一部模仿真正機械人駕駛室嘅大型球形控制室入面,望住前面差不多成180度嘅畫面,今人有好強烈,好真實嘅feel,再加上可以用mic同headphone即時同隊員通訊,真係好似打緊仗咁,好好玩. 
雖然成500yen一局,我地都玩咗兩局, 如果唔係夠鐘要走,我地仲想玩多幾局呀.
之後我地就返上野join返Joanne佢地,一齊係阿英橫町入面一間食魚生飯嘅舖頭食lunch. (其實之前一日都係呢間度食lunch)
然後就返酒店攞行李,去搭Skyliner去成田機場.
去到成田機場,出孚意料地少人,我地好快就check-in咗啲行李. 基於係函館機場嘅經驗,團友M同團友V就拎起兩支酒,諗住hand carry上機.
點知到我地shopping完,過海關個時,團友V就俾人截住,叫佢拎兩支酒出黎,因為多過100ml嘅液體係唔可以hand carry上機. (多得啲恐怖份子唔少) 好在ANA都俾佢再寄倉,如果唔係就哂咗兩支酒啦.
當團友V去緊寄倉之際,團友M又出事,今次係因為佢啲護膚品,最後佢要放棄一支成三百幾嘅護膚品先過到關.
好啦去到閘口,以為可以安心上機,咁我地就去最後之shopping,點知冇幾耐,團友V發現ANA職員舉哂牌搵人,其中一個係我!
做咩事搵我呢? 唔通upgrade我去buiness class? 即刻去courter報到先!
點知原來係佢地係我個行李入面scan到有個打火機,耍我開行李箱,拎返出黎. OK,冇問題. 就咁樣我個靚靚北斗之拳打火機就要留係成田啦.
呢件亦係成個日本之旅嘅最後小風波. 之後我地就坐ANA 返香港,完成我期待咗成年嘅10日,日本北海道加東京之旅啦.
7月2日 (銀座, 三鷹, 台場)
由於團友M要買 Burberry Blue Label,所以食完早餐之後就一齊去咗銀座,先行博品館買下玩具,再帶Joanne同團友M去 Burberry, 而我同團友V就去三鷹の森ジブリ美術館. 去到三鷹車站,已經成12:30pm,我地見未有龍貓巴士,唔想等,就沿住幾靚嘅"風之散步道", 行去三鷹の森ジブリ美術館. 到達時已經12:45pm. 門口個職員話我地張入場券只可以係12:30pm之前入場,由於我地遲咗,唔可以入去. 不過係我地苦苦衷求,加上佢知我地係遊客,最後都放我地入場,好彩.
入面大部份地方,尤其係室內都唔可以影相,不過我都影咗唔少.
當然唔少得名物--天空之城機械人啦.
參觀完,買完記念品,就走啦. 出到門口,見到龍貓巴士停係度上緊客,我地即刻跑上車,坐返去三鷹車站.
之後係JR火車上面收到 Joanne 嘅 SMS,知道佢地返咗酒店休息,咁我地就直接返酒店會合. 休息一陣,就去京成上野站買定Skyliner車票,準備 7月3日去成田機場.
然後就去台場繼續shopping. 晚餐就係Venus Fort個 food court 食. 冇乜特別. 唯一要提下嘅就係呢樣嘢喇:
當我地order咗之後, 間舖就會俾件咁嘅嘢我地,到食物整好啦,佢就會響同閃燈,咁我地就可以去攞食物. 用呢種方法,就唔使好似香港啲 food court 咁叫咪,整到好嘈雜. 所以個 food court 好靜. 要讃下.
之後我地就返酒店訓啦.
7月1日 (上野, 池袋, 澀谷, 新宿)
早餐係酒店樓下嘅Italian Tomato食,因為係包埋嘅. 食完就出發去池袋. 今次嘅目的地係SunShine City,主力shopping.冇乜特別. 到 lunch time, 我地諗咗好耐食啲乜,最後我力爭成功,一齊去食 お好み焼. 個間餐廳係俾客人自己整燒餅嘅, 我地叫咗兩個唔同味道嘅燒餅. 因為唔係好識黠整,第一個就由服務員哥哥操刀,我地學.
原本步驟係:
1.將所有材料攪好
2.係已經燒熱嘅鐵板上落油
3.將材料放落鐵板,成餅形.
4.放好蓋,煎4分鐘
5.反轉面,再放好蓋,煎4分鐘
6.落燒汁,完成.
係服務員哥哥完成第一個燒餅之後, 我地就自己試整第二個, 效果都OK.
食完兩個燒餅, 唔係好飽, 再叫多一客燒牛肉同一客炒麵.
食完lunch,諗住走人,行過Godiva,見到好多人買朱古力特飲, 我又買咗一杯, 好濃好香朱古力味,正!
其間見到好多人排哂隊,原來係食Burger King!!
跟住我地去咗澀谷,又係shopping. 唯一要提下嘅係我居然係Lawson買到第二日下午12:00嘅三鷹の森ジブリ美術館入場券,好!
Shopping完我地就去新宿,目標係Mo Mo Paradise. 可能我地早去 (大約 6:30pm), 唔使等位, 開開心心食咗90分鐘, 食完係 lift 口,團友們仲遇到又係自遊行日本嘅同事.
食飽飽就要夾下公仔,玩下黎消化一下. 
之後就返酒店啦.
6月30日 (函館, 上野)
一早起身梳洗完就去食早餐,同之前一晚嘅晚餐一樣,好好味. 食完早餐就返房再浸一次溫泉. 
大約11點就check-out. 渚亭嘅服務真係太好啦,check-out之後, 酒店嘅女服務員幫我地打傘,又幫我地拎行李上車,攪到我好唔好意思,自己爭住做返啲嘢.
之後我地就去函館車站附近,諗住shopping啦,點不知嗰頭係冇嘢好買. 於是我地轉移地方,去丸井今井. 冇興趣shopping嘅我係放低團友之後,就自己去行五稜郭公園.
五稜郭公園隔離有個五稜郭公園塔,係函館嘅地標之一. 所以四周都有五稜郭嘅標誌.
行完之後,返去丸井今井同團友會合,又影咗函館電車. 
然後我地就去咗一間食牛肉飯嘅地方食lunch,坐係隔離枱嘅又係香港人. 今日係我地係北海道嘅最後一日,呢個北海道之旅,每一日都見到香港人,可見北海道真係香港人熱門旅遊點. 
個lunch不過不失,只係快餐店,又唔係吉野家,唔可以太苛求. 休息一陣之後,我地就出發去函館機場.
去到函館機場,放下團友同行李之後,我就去還車. 去到 Nissan Rental 係函館機場個 outlet, 有位靚女check咗一陣架車就話OK. 跟住就問我係唔係去函館機場? 我答係,佢就叫我上返車,佢原車車我返函館機場. 到咗函館機場仲落車想幫我拎行李. 我當然話唔使啦,因為一早已經unload咗. 早知有靚女車我,我就扮唔識路,叫佢車我上函館山先,再返機場,遊下車河先,反正仲有成兩個幾鐘先上機....
我同Joanne都好順利check-in哂啲行李. 但係團友M同團友V就有啲問題,因為佢地只係用backpack,但係就買咗兩支酒,ANA職員就叫佢地拎返兩支酒出黎,hand carry上機,因為backpack軟身,保護唔到支酒. 本來冇乜問題,不過就係呢個經驗,令正之後係成田機場發生第二件事故.
Check-in完之後,就係shopping同影相時間. 
6:30pm我地就上機去東京外羽田機場. 到達後就轉JR去御徒町站. 出閘後發現落緊雨,我地只好冒住雨搵酒店. 好在只係5分鐘到,我地已經到達之後3日都係度住嘅 HOTEL SARDONYX UENO喇.
Check-in完之後,就出街搵嘢食. 原本Joanne想今晚去新宿食Mo Mo Paradise 嘅 Shabu Shabu 放題, 不過由於時間已經唔早,加上大家都有啲攰,所以我地就係阿美橫町搵咗間食韓式燒烤嘅餐廳,又豪咗一次啦. 食完嘢,行咗一陣阿美橫町,就返酒店訓啦.
6月29日 (登別, 函館)
朝早起身食完早餐就再浸一次溫泉,因為之前一晚男女湯已經對調咗,可以試埋另一個溫泉啦.
之後check-out,搬哂行李上車之後,我地就行去熊牧場啦, 即係香港人好熟悉嘅"熊出沒注意"個度.
去到售票處,我地先買咗兩個景點用嘅票,因為我地會去埋海洋世界.
上熊牧場係要坐cable car 上山嘅. 當日非常大霧,團友M同團友V上咗前一卡, 但係當架cable car離開車站之後, 就已經見唔到啦.
上到熊牧場就更大霧,所以所有相都係白茫茫一片.
熊牧場將啲熊分開雌雄黎養. 我地先去一号館睇公熊. 
再去二号館睇雌熊. 
唔少得嘅係餵熊啦. 
當我見到啲熊為咗叫你餵佢而做出一啲可愛動作時,都覺得好開心. 不過之後諗返起,又覺得佢地好可憐,因為雖然佢地唔使為生存而憂慮,但係成世俾人困係個籠入面,唔可以出外面,真係好慘.
睇完一,二号館,居然落起大雨,我地唯有先去記念館參觀,
參觀完,雨亦都停咗,團友們都覺得係時候離開,所以我地買咗啲記念品之後就坐返cable car落山,趁冇雨去攞車走人啦.
下一個站係登別海洋世界. 大約15分鐘車程就已經到達,不過我跟住GPS嘅指示,兜咗去海洋世界嘅後面去搵停車場,點知係死胡同. 想U turn之時見到對頭車個司機望住我地笑,心諗佢可能知道我地都係一樣信錯GPS,因為大家都入咗死路. U turn之後我就跟住佢地架車,轉返出大路,就見到海洋世界個停車場入口,而佢地亦入咗去.
海洋世界個停車場係要500yen,唔係無料嘅. 泊好車之後,發現之前架車就泊咗係我地對面, 入面係兩pair男女, 睇衣著應該係香港人. 之後係toilet聽到佢地講廣東話,仲唔係香港人?
入到海洋世界,第一眼見到嘅就係個大城堡,我地冇即刻入去,而係跟住指示去搵海獅表演. 未搵到海獅表演場地之前,見到個水池,入面有4隻海豹係度游緊水,
睇咗一陣就去咗睇海獅表演啦. 
睇完出黎,見到好多人圍住個海豹水池,原本可以買魚仔餵海豹,我地當然唔會錯過啦. 
其中體形最細個隻海豹,係我地一舉起條魚準備掉落去餵佢嘅時候居然唔係好似其餘個3隻咁樣伸個頭出水面等食,而係好驚咁游開! 我地覺得好奇怪,後來先發現原來其餘個3隻入面最大隻個兩隻係會係我地掉啲魚落去個陣,走埋去打個隻細海豹再食埋條魚. 我地見佢咁可憐,又可愛,加上唔鐘意其他個幾隻咁霸道,就使出"聲東擊西"之計,引開其他幾隻嘅注意,不停咁餵細個隻.
餵完海豹,我地就入去個城堡,原來個度係大型水族館,除咗幾層樓高嘅魚缸同各種海洋魚類之外,仲有可以用手摸嘅海星同魔鬼魚. 好好玩.
睇完大型水族館,啱啱夠鐘睇海豚表演. 係個度睇海獅,海豚表演同係香港海洋公園睇嘅表演最唔同嘅係--距離. 係登別海洋世界,觀眾席同個水池好近,坐最前個兩排係分分鐘會俾海豚整濕哂身架. 亦都係因為近,所以觀眾都睇得好清楚同好投入.
睇完海豚表演已經差不多下午1:00,係時候去醫肚啦. 
食完lunch就係個日嘅重點--企鵝巡遊啦. 可以近距離睇住啲企鵝好可愛咁行來行去,真係好開心.
係為時大約25分鐘嘅企鵝巡遊之後,我地就出發去函館啦.
為咗慳時間,我地當然係上Expressway啦,中途我地停咗一個中途站休息同入油. 原來個度可以見到有珠火山同昭和新山,當然要影張相留念啦.
呢一程車足足成3個鐘,因為大部份Expressway得單線,好難爬頭,再加只係一頭一尾有Expressway可以行,中間有大約一半路程係無Expressway,成個幾鐘頭要用50-60km/hr咁行,好慘呀.
最後都去到當晚住嘅酒店--渚亭啦. 呢間酒店係全個trip最貴嘅一間, 不過住過之後,我地都一致認同係值嘅.
首先係服務非常之咁好. 一到達已經成排人咁歡迎我地,有人幫我地搬行李落車,有代客泊車. Check-in之後有wellcome drink, 我飲咗杯香檳. 個經理仲操流利英語,又提醒我地10:00pm之後上函館山只可以自己揸車(啱哂!). 行李有專人拎上房之後仲會介紹埋房入面個私人溫泉.
之後個自助晚餐更係好味到不得了. 比起登別Mahoroba個餐好味幾倍. 餐廳仲有無敵沙灘海景,真係無得彈. 美中不足嘅係公共溫泉比較細(都有成十個池),不過有個私人溫泉補返數,算啦.
食完飯,浸過溫泉,十點鐘之後,我地就出發去函館山,為嘅係世界三大夜景之一. 出發冇幾耐就落起雨黎. 上山條路好多彎位,十足頭文字D feel. 加上天雨路滑,我開得好慢. 沿途見到唔少車泊係山崖邊睇夜景,都幾危險. 上到山頂,雨越來越大,好在函館山夜景實在太吸引,團友們先肯陪我,等我影相.
返到酒店,一身濕哂,最好緊係浸多次溫泉(私人嗰個)先訓啦.
