狗奴才的窩

2007年9月12日星期三

蓉蓉三歲啦

今日係蓉蓉三歲生日嘅大日子，唱首生日歌先。
Happy Birthday to you!
Happy Birthday to you!
Happy Birthday to 蓉蓉!
Happy Birthday to you!

仲有Mike仔都係三歲啦。Mike Mike Happy Birthday!

其實星期日已經同蓉蓉慶祝咗. 個日我地突登早啲起身(都成11:00),同BB,蓉蓉一齊行街街,去咗北角Pet Central. 去到仲幾早,冇乜人.

坐咗一陣,有其他小朋友黎啦.

同佢地玩咗一陣,諗住同蓉蓉買生日禮物,點知 Pet Central 突然爆消防喉,流到一地都係水,啲職員都要去救災,冇人得閒,買唔成.

之後就一家去咗Starbucks lunch. BB同蓉蓉都好enjoy, 因為有好多人行過都同佢地玩下, 又讚佢地.

之後就買咗個生日蛋糕,晚上同佢地去咗阿爸阿媽度一齊慶祝.

2007年8月30日星期四

去鯉景灣玩

上星期日朝早打完波,同班friend一齊去食lunch, 去咗鯉景灣,見可以同埋狗仔一齊, 就帶埋BB,蓉蓉一齊去食. 佢地好少同一大班人一齊食,所以好開心.

食完飯之後就係鯉景灣海濱玩咗一陣,佢地好開心.

2007年8月21日星期二

"呼呼"精

BB好唔鐘意俾人抱,尤其係眼訓嘅時候. 如果你係嗰時抱佢, 佢就會依起排牙,發出"呼呼"聱,好似想咬人咁,當然佢係靠嚇,唔會真係咬人. 所以我地就叫佢「呼呼精」.

不過BB好注重形象,佢唔鐘意俾人影到「呼呼精」樣,就算佢幾咁唔開心, 我地一拎部機出黎,佢就即刻唔"呼呼",成個樣立即變成好可憐咁,真係好好演技. 上面張相我地"吼"咗好耐先影到架.

2007年8月14日星期二

睇外語片要睇原裝,唔睇配音版

上星期五打8號風球,早放幾個鐘,見銅鑼灣唔係好大風,就自己一個去睇場戲 -- 五星級大鼠Ratatouille.
可以用一句"pixar出品,必屬佳品"來形容. 正!!!
不過一定要睇原裝英文版! 呢樣係我嘅堅持! 尤其係睇完Sherk 3之後,我更加堅持呢個原則.
Sherk 3!我係睇中文配音版,真係差好多. 好多應該好笑嘅位都係中文配音之下變到唔好笑.
咁點解我會去睇中文版呢? 之唔係因為好難揾英文版睇囉!!!!

以前外語片,尤其係動話,都會有起碼一半戲院播原裝外文版! 不過近年來大部份戲院都係播中文配音版. 想睇原裝外文版? 請到東涌! 再唔係就要係office hour或早場先有得睇.

依家搵英文版真係好辛苦,好少戲院有. 咁即係話多人想睇配音版.... 呢一樣令我好唔明白....

呢一類型嘅戲,我唸大部份嘅觀眾都係細路仔. 即係話啲細路仔或者係佢地嘅家長都prefer配音版,而唔想睇英文版, 而同時間放棄一個好好嘅學英文嘅機會..

但係佢地又會真金白銀,俾成萬銀去買啲multimedia tool去俾啲細路仔學英文....真係....

香港人呀! 係反對母語教育,埋怨政府嘅教育政策令到下一代英語水平下降嘅時候,你地又有冇想一下自己係唔係幫凶之一呢?

2007年7月27日星期五

香港動漫節2007

書展之後又係一年一度嘅動漫節啦. 由第一年開始年年都有去. 不過逗留嘅時間越來越短. 唔係因為自己對動漫嘅興趣減退,而係覺得動漫節對於真係想買漫畫書嘅我已經變得可有可無. 以往出版商都會將近出版嘅書集中係動漫節推出,而外面係遲啲先買到. 心急嘅我就會去動漫節一次過買哂所有新書. 而且好多時動漫節都有折扣. 所以雖然要排好耐隊,我都願意.

但係而家就唔同, 新書係外面嘅舖頭都同步買到, 而且宜家動漫節都冇折扣, 反而外面嘅舖頭會有平,又唔使排隊,所以今年可能唔入場啦.

不過點都好, 新書一樣會買, 今年嘅target係:

天下

浪客行#26(平裝) 【27/07 入手】

CROSS GAME#8 【31/07 入手】
JOJO奇妙的冒險PART 7~Steel Ball Run#12 【31/07 入手】
ONE PIECE#46 【31/07 入手】

玉皇朝
蒼天之拳#17

文化傳信
漂流艦隊#27

常務島耕作#6(完) 【25/07 入手】

2007年7月25日星期三

又係書展

2007年書展又完咗,我星期五放工去行,都有唔少收穫。當中呢本係第一本睇完嘅。

攝影日記－－野生動物診療所, 作者「竹田津實」係一名獸醫,因為一次為一對小兄弟帶來的一隻受了傷的鳶,開始為野生動物診治生涯。由於病患的數目和種類與日俱僧,作者在十年後決定建立一間森林診療所。本書記錄了這森林診療所部份個案,加上大量圖片,令到一向愛小動物的我愛不釋手。

除咗呢本之外,仲有、、、

2007年7月18日星期三

緊接北海道之旅嘅東京之旅 (三)

7月3日 (秋葉原, 上野, 香港)

呢日係成個trip嘅最後一日,我地食完早餐,10:00 check-out酒店,將行李寄存係酒店之後就兵分兩路: Joanne同團友M 就留係上野shopping, 我就帶團友V去秋葉原行下.

始終秋葉原係啱男人多啲.

係秋葉原,我地終於玩到一路都好想玩嘅街機: Gundam -- 戰場之絆.

點解咁想玩? 因為香港一定冇得玩. 由於部機好大部,而且一裝就起碼要裝4部,仲有一部terminal,香港唔會有地方同有人肯投資咁多,所以香港唔使旨意有得玩.

呢部機係玩嘅時候係要坐入一部模仿真正機械人駕駛室嘅大型球形控制室入面,望住前面差不多成180度嘅畫面,今人有好強烈,好真實嘅feel,再加上可以用mic同headphone即時同隊員通訊,真係好似打緊仗咁,好好玩.

雖然成500yen一局,我地都玩咗兩局, 如果唔係夠鐘要走,我地仲想玩多幾局呀.

之後我地就返上野join返Joanne佢地,一齊係阿英橫町入面一間食魚生飯嘅舖頭食lunch. (其實之前一日都係呢間度食lunch)

然後就返酒店攞行李,去搭Skyliner去成田機場.

去到成田機場,出孚意料地少人,我地好快就check-in咗啲行李. 基於係函館機場嘅經驗,團友M同團友V就拎起兩支酒,諗住hand carry上機.

點知到我地shopping完,過海關個時,團友V就俾人截住,叫佢拎兩支酒出黎,因為多過100ml嘅液體係唔可以hand carry上機. (多得啲恐怖份子唔少) 好在ANA都俾佢再寄倉,如果唔係就哂咗兩支酒啦.

當團友V去緊寄倉之際,團友M又出事,今次係因為佢啲護膚品,最後佢要放棄一支成三百幾嘅護膚品先過到關.

好啦去到閘口,以為可以安心上機,咁我地就去最後之shopping,點知冇幾耐,團友V發現ANA職員舉哂牌搵人,其中一個係我!

做咩事搵我呢? 唔通upgrade我去buiness class? 即刻去courter報到先!

點知原來係佢地係我個行李入面scan到有個打火機,耍我開行李箱,拎返出黎. OK,冇問題. 就咁樣我個靚靚北斗之拳打火機就要留係成田啦.

呢件亦係成個日本之旅嘅最後小風波. 之後我地就坐ANA 返香港,完成我期待咗成年嘅10日,日本北海道加東京之旅啦.

緊接北海道之旅嘅東京之旅 (二)

7月2日 (銀座, 三鷹, 台場)

由於團友M要買 Burberry Blue Label,所以食完早餐之後就一齊去咗銀座,先行博品館買下玩具,再帶Joanne同團友M去 Burberry, 而我同團友V就去三鷹の森ジブリ美術館. 去到三鷹車站,已經成12:30pm,我地見未有龍貓巴士,唔想等,就沿住幾靚嘅"風之散步道", 行去三鷹の森ジブリ美術館. 到達時已經12:45pm. 門口個職員話我地張入場券只可以係12:30pm之前入場,由於我地遲咗,唔可以入去. 不過係我地苦苦衷求,加上佢知我地係遊客,最後都放我地入場,好彩.

入面大部份地方,尤其係室內都唔可以影相,不過我都影咗唔少.

當然唔少得名物--天空之城機械人啦.

參觀完,買完記念品,就走啦. 出到門口,見到龍貓巴士停係度上緊客,我地即刻跑上車,坐返去三鷹車站.

之後係JR火車上面收到 Joanne 嘅 SMS,知道佢地返咗酒店休息,咁我地就直接返酒店會合. 休息一陣,就去京成上野站買定Skyliner車票,準備 7月3日去成田機場.

然後就去台場繼續shopping. 晚餐就係Venus Fort個 food court 食. 冇乜特別. 唯一要提下嘅就係呢樣嘢喇:

當我地order咗之後, 間舖就會俾件咁嘅嘢我地,到食物整好啦,佢就會響同閃燈,咁我地就可以去攞食物. 用呢種方法,就唔使好似香港啲 food court 咁叫咪,整到好嘈雜. 所以個 food court 好靜. 要讃下.

之後我地就返酒店訓啦.

緊接北海道之旅嘅東京之旅 (一)

7月1日 (上野, 池袋, 澀谷, 新宿)

早餐係酒店樓下嘅Italian Tomato食,因為係包埋嘅. 食完就出發去池袋. 今次嘅目的地係SunShine City,主力shopping.冇乜特別. 到 lunch time, 我地諗咗好耐食啲乜,最後我力爭成功,一齊去食お好み焼. 個間餐廳係俾客人自己整燒餅嘅, 我地叫咗兩個唔同味道嘅燒餅. 因為唔係好識黠整,第一個就由服務員哥哥操刀,我地學.